HAIKU POEZIJA

supamės
nebeatskiriu debesų
ir tavo garbanų

Prakaba į šermukšnį. Haiku. Vilnius, SLINKTYS, 2024

HAIKU ŽEMAITĖŠKĀ

A tori Ognėis
pavėrstė pavasario
dėdliausem’ šaltie?

x x x 

Pavasarielis.
Akmėnū akelės viel
palašā gražiuo.

x x x 

Dėdiuoju pelkė.
Puopėrėnem’ laivīnė
vākū svajuonės.

x x x 

Kaštuonā kišenie.
Viejē laiškū prirašė
viel lapu lapās.

x x x 

Duobėlū laukūs’
nusėdūsava vakars.
Jaukē ožtema…

x x x

Traukėnēs liektė
pradiejė dėinas-naktis.
Gīvenėms ėšskob.

x x x 

Trinkteliejė vasara.
Galvelė sokas smarkē
nu šėina kvapa.

x x x 

Perbieg trīs katės
per mona gīvenėma.
Bet nesėspjaudau.

x x x

Žemougės pėivuo.
Betrūkst laimingam vākou
tik pėina kvapa.

x x x 

Žvīrā pu kuojuom.
Pažīstamūs’ garsūs’ skėst
prėsėmėnėmā.

x x x 

Kamėnū dūmās
numū gīvībės raituos.
Pavakarė mets.

x x x 

Kombainā ūžė.
Vasaras ruomantika
be šėrdėis kūlė.

x x x 

Leidas saulelė.
Bliūda* vundinie matuos
morzėnas kuojės.

*Bliūdas – dubuo.

x x x 

Ėlguo keliuonie
veinakis pruožektuorios
nakti pjaustinie.

x x x 

Katėla dongtēs
nutarškiejusi dėina.
Eilėnē darbā.

x x x

Dolkėnam’ longė
paskotėnė meluodėj
mosės grajėj.

x x x 

Ont senū trepu*
katėn žalem’ bliūdalie
mėnolė morza*.

*Trepai – laiptai;      **Morza – veidas.

x x x

Tapalė šakuos’
nu senū deinū kabuo
tievalė dalgis.

x x x

Cīrulis* pragīd.
Dongos šolėnės dognė
rīškiausē sospind.

*Cīrulis – vieversys.

x x x 

Vielēk sogrīžau.
Čė baltūs’ dobileliūs’
svajuonės mona.

x x x

Jaukoms vakara.
Ož daržinies gėrdietėis
šonėis lekavėms.

x x x

Žėimuos rūpesnē.
Mamas kriaučkiniem* žirkliem
anus sokarpīsio.

*Kriaučkinis – skirtas siuvimui.

x x x 

Ne žalė žiuogā
sočėrpėn šėrdeis stīguom.
Žuodē pri opės.

x x x

Buobu vasara.
Ont smėlgu aukštū buokštu
vuorā pasėkuorė.

x x x 

Vėišnė pražīda.
Nugluostinietas šakas
raukšlietu pėrštu.

x x x

Mielėnas gielės
ont babas poudilieliu
pražīda vielēk.

x x x

Tuolėma žėima
puortėgrapijuo senuo
dėdelē šėlda.

x x x

Bažnītės stuogė
vasarė saulė maivuos.
Gamtuos mondromā.

x x x

Rasuotė rītā.
Apsnūdus’ žuolie sapnou
dalgė ašmėnis.

x x x

Kap laps pernīkštis
sopous ont bangū ramiū.
Paleidau vėskū.

x x x 

Kristaus veidė
dėdelė ramībė matau.
Tīliekėt, bornas!

x x x

Kūtės* šėlėma
plūst pru atvėras duris.
Ėr viel suoduo* briekšt*.

*Kūtė – tvartas;    **Suoda – sodžius;     ***Briekšt – temsta.

x x x

Laukė pūgavuo.
Ont pakuruoms garās vėrst
snėiga lėkotē.

x x x 

Daktara runkuos’
baltė puopierē šuokčiuo.
Prastas naujīnas.

x x x

Jūra nervuojės.
Tėlta turieklus laižiuo
bangas putuotas.

x x x 

Grībavėma mets.
Ont pečiaus džiūn sovertė
ėlgė karuolē.

x x x 

Šuokčiuo kiaušelē
karštū dažū vuonelie.
Rītuo Velīkas.

x x x

Laumės žėrgielis
puortėgrapėjės dara
šlapiū žuolīnu.

x x x

Jazmina smuokūs’*
ikaitusi vasara
kramelės* apsok.

*Smuoks – kvapas;     **Kramelė – galvelė.

x x x 

Drūtė oužoulā
pri Apoulės ėr Skouda
tvėrtuovė sauga.

x x x

Senam malūnou
dontelē ėštrupiejė.
Renkam rėišutus.

x x x

Pradiej plepietė
opelē griuoviūs’ vėsūs’.
Pabonga žėimuos.

x x x

Sentikiu* truobuos’
kėtuokius krīžius matau.
Bet Pondėivs tas pats.

*Sentēkē – religinė bendruomenė.

x x x 

Tarp aukštū pušū
sekminiu maldas soskomb,
lėzdus sosėsok.

x x x

Arklinis vežėms
partratėn sausus šėinus.
Pradiejė krapīt’*.

*Krapītė – smulkiai lašnoti.

x x x 

Rūtas pražīda.
Soknelės baltas siovas
jaunas mergelkas.

x x x 

Pri Švėntuos Vuonuos
švėisi galvelė glaudās,
maluonės pėlna.

x x x 

Ketorims klevams
kortuom sožaistė paded
viejē rogsiejė.

x x x 

Bolbėinuojēs kvep.
Vedom* nuovargis dėlgčiuo
muolėnuos’ kuojuos’.

*Vedom – mums dviems.

x x x 

Čėršk kiaušėnīnė
taukū pėlnuo pėtelnie*.
Posrītiu garsā.

*Pėtelnė – keptuvė.

x x x 

Vuobuliū sunka
laš nu vėrtovės stala.
Suodnu gīvībė.

x x x

Šviežės bolbelės
kastėnė baltomė skėst.
Onkstībos derlios.

x x x 

Jautiu ganīkluo
rauduona koskelė* šveit.
Drūsi ta madam.

*Koskelė – skarelė.

x x x

Droskėnė sena
liūd ont staktuos žaliuos.
Toštė vakarā.

x x x 

Tolpės pražīda
laimingu vīru gliebiūs’.
Kuova mienesis.

x x x 

Parliekė kregždės.
Gatviu matematikuo
viel sprėndas līgtis.

x x x 

Sunkē mėiguotė
tās lėipas vėdornaktēs.
Slīvas kritinie.

x x x

Vakulielis kriuok*.
Mažuos’ auselies’ vielēk
lėga isėmet’.

*Kriuok – verkia.

x x x 

Rītmetė rūkā.
Šiauliū katedra ėškėlst
dom gulbiu sparnās.

x x x

Sesou parneš’
abieciu* rėtėnelius.
Pražīdies sėinas.

*Abieciai – tapetai.

x x x 

Mažos angelielis
tīluo ruoželės barsta.
Brongė kapelē.

x x x 

I.   Mūsa ženatvė,
      runkuos’ baltas ramonės.
      Pėrma nuotrauka.

II.  Do sūnaitelē
       berža vėršūnie joukas.
       Ontra nuotrauka.

III.  Mūsa anūkā
        blīnus po longo valga.
        Treti nuotrauka.

x x x

Žėrnieliu ūsā
žalē ož tuoruos raituos.
Leipas garbanas.

x x x

Saulė ōž mėška.
Kamanės jaukē mauduos
medetku smuokė*

*Smouks – kvapas.

x x x 

Dvė žousis kaklās
baltās viejems dėrėgou.
Darnos uorkestros.

x x x

Daržūs’ važinie
sauliegrāžu tekėnē.
Lītaus nebėbūs.

x x x 

Natas ėšmietius’
audra grajėj meluodėj
elektras laidās.

x x x 

Siedo ramībie.
Delna švelniausē koten
šonėis lėižiuvis.

x x x 

Vėdorvasaris.
Laukūs’ vielēk snīgoriou
bolviu žīdiejėms.

x x x 

Stuoj šaltas naktis.
Viel žvaigždie viedra* dognė
sosting i leda.

*Viedras – kibiras.

x x x 

Vasara bėgnās.
Neramē numū longė
drugielis trunkuos.

x x x 

Rodėnėis minuors
miediu vėršūnies’ grajėj
žėnuomas gaidas.

x x x

Rausvos lėižiuvis
brauk per baltas pein potas.
Meili vagīstė.

x x x 

Erzelīnė smuklie.
Baisi zlastė* kuošās pru
dėdelius zūbus**.

*Zlastė – nervai;   **Zūbai – dantys.

x x x 

Plunksna ont kelė.
Šėndėin kāp tik reikiejė
dongaus žėnkla.

x x x 

Baršk vākā laukās
senuobėnio dvėratio
Bi tik judietė!

x x x 

Lėngvā prisnėga
ont ceratas* gielietas
kvėitiniu mėltu.

*Cerata – stalo klijuotė.

x x x 

Priglaudiau ausi
pri senuos spintas šuona.
Ėšdėdi tīla.

x x x 

Dā tik saulė tek,
rasas i dongo kel,
šėrdelės vėrpėn.

x x x 

Numinis alos
linksmā besėsukiuodams
trėnk’ i pakauši.

x x x 

Sogrīžt šėlėma.
Viel šėrdės džiaza praded
svajingā grajīt’.

x x x

Nemon vondėnio
Juoniniu vainėkūs plauk
trumpiausė naktės.

x x x 

Ruošamies švėntiem.
Muotrėškas veilēk kriuokėn
krienū šaknelės.

x x x 

Prasėded gīvīb’.
Pakrūmės prasėmerkė
žīdruom akeliem.

x x x 

Atšėla deinas.
Viel šprunklē* vėsė
jupuom* nukabinietė.

*Šprunklis – pakaba rūbams;   **Jopa – suknelė.

x x x

Tėkros lapkritis.
Baladuojēs palungiem
šaltiausė lītā.

x x x 

Vėsa bažnītė
per pėrma Kuomunėjė
baltoun angelās.

x x x 

Ruošamies žėimā.
Medius gliebēs nešam i
malkėnės pėlva.

x x x 

Pašalpū deinas.
Viel laukūs’ pasėskleid’
pijuoku dainas.

x x x 

Koisiaus* meluodėjė
vėsa nakti mon nervās
siekmingā grajėj.

*Kuisis – uodas.

x x x

Kaspėnā baltė
drogelēs dōm skraidžiuo
dukruos kaselies’.

x x x

Nu aukšta kalna
ne deinas kūlēs* rėtas –
gīvenėms rėtas.

x x x 

Atpliešiau laiška.
Mielėnam’ atvėrokė
pažīstams braižos.

x x x 

Žveig pjūklalē.
Mėšk dėdinguo karūnuo
prapol vėršūnės.

x x x 

Pu aukštuom lubuom
driegnė akmėnis dūsaun.
Dvara vīnėnė.

x x x 

Skanos kavuos smuoks*
šeimīna lėngvā pakiel’.
Sekmadienė rīts.

*Smuoks – kvapas.

x x x 

Sena meistarnė.
Tarp kaltu, abliu*, kūju
stebuklā ožgimst.

*Ablis – oblius.

x x x 

Sožīdiejė lazda
muotėnas kėimė senam’.
Ožuomarša vāks.

x x x 

Pradariem duris.
Bolbiniu klecku kvapā
solind i nuosi.

x x x 

Jaukiuo kavinie
dvė kanarelės cīpaun.
Audrings puokalbis.

x x x 

Pėivu žīdiejėm
pasemk pėlna krūzieli*
šėrdėi pagėrdīt’.

*Krūzielis – puodelis.

x x x 

Buoroželės dvė
nu vāka pėršta nuliek’,
vo taškelē lėk.

x x x 

Mona šėrdės jau
vėsā ėš pruota ėšejė.
A pavasaris?!

x x x 

Nuojautas nagā
rakaliuo* mon krūtėnė.
Vakars jau vielos.

*Rakalioti – giliai krapštyti.

x x x 

Muotrėškas pražīd
viel jupuom spalvuočiausiuom.
Pavasario kvep!

x x x 

Nutėl paukštelē.
Per mona ronkas perliek’
viel tava baimė.

x x x 

Bruolis tebšokou
senuos komelės kartius
aukštūs’ duobėlūs’.

x x x

Nuvingoriava
tievoka meluodėjė.
Tīloms vakara…

x x x 

Per mona kuojės
žuvis rainas brūkšteliejė.
Tuo vondėns skaidroms!

x x x 

Šnekam lig rīta.
Kol gražės sesės akis
puodėškuo* nuskėnd.

*Puodėška – pagalvė.

x x x 

Vainėks ont ragū.
Žuolīnu karalienės.
ilgesings „mūū mūūū”…

x x x 

Vėšta perekšlė
parved’ dėdel’ šeimīna.
Lėipas staigmena.

x x x 

Pupu katėlioks.
Tēp šaunē būs jiest’ ėr jiest’,
garsē pirsteliet’.

x x x 

Tėn altuoriaus nie.
Bet mažuosės kiaulelės
vėitas sosėrada.

x x x 

Praaug žuolelės.
Jė akmėnū nebėjė,
tēp aug ėr žmuonis.

x x x

Atleisk, viel atleisk,
Švėnta Marėjės mama!
Lėipa jau bėngās.

x x x 

Tetės sermieguo,
mamas jopas* kėšenie
mūsa mazgelē.

*Jopa – suknelė.

x x x

Sozvanėj* varpā.
Pakėlst rūpiesniu pėlnas
nuleistas galvas.

*Zvanītė – skambinti.

x x x 

I sklepa* balki
skubiedamė gīventė
makaulės** trunkiem.

*Skleps – rūsys, palėpė;   **Makaulė – galva.

x x x 

Nu onkstaus rīta
do spindolē bočioujės
ont mona taka.

x x x 

Cinemuona kvaps
viel atplaukė pru duris
Kaliedu rīta.

x x x 

Beržā ėšspruogė.
Sosiedė kapstuom kėkveins
trīni kiaušėnė.

x x x 

Ratās ėr batās
maujuojem kelalius.
Snėigā pasėleid.

x x x

Margās gozėkās*
sosagstiau dėinas sava.
Gražė apdarā.

x x x

Kvep duonelė
vėsas numieliu kertės.
Laukė līnuo.

x x x 

Rakštės sobinie*
viel erzėn jauna pruota.
Ėrleko spalie.

*Subinie – užpakalis.

x x x 

Prėsėmėnėmās
apėplūdusi dėina.
Verdam ougīnė.

x x x 

Mūsa kalnė telp
parīžē, ruomas ėr rīgas.
Svajuoklē vākā.

x x x

Grīžto traukėnio.
Viel pažīstamė vaizdā
pru longus mojou.

x x x 

Špuokėnīčiuos* cip
naujės mažas gīvībės.
Ožtek saulelė.

*Špuokinīčė – inkilas.

x x x 

Žvaigždīnu lītos
bieg vėsās numū stėklās.
Magėška naktės.

x x x

Senuom turielkuom*
rimtė griaustėnē griaudie.
Tvarka tor būtė!

*Turielka – lėkštė.

x x x

Dongaus lėktarnuos’*
vės matau veida tava.
Bjauros prėpratėms.

*Lėktarna – žibintas.

x x x

Laikraštiū diežie
daug joudūju vabalū
skaitītė muokuos.

x x x 

Katėnās ožkniauk’
paop’ žalsvė krūmalē.
Gražos metielis!

x x x 

Cėbuliu* kasuom
sėinas nukabinietas.
Šuku čė nerēk.

*Cėbolė – svogūnas.

x x x 

Plunksnoutas galvas
indienu garsiuom dainuom
dėinas ožkariava.

x x x 

Smėlkalū dūmā
plauk per paveiksla tava.
Iduomi šnekta.

x x x 

Švėntos Proncėškos
paukštilelius sošaukė.
Pragīda žemė.

x x x

Do ėlgė, vėins – trumps.
Degtuku luoterėjuo
viel dalīvaujo.

x x x 

Ežioks ont stala
tetės baltuo kepurie.
Šaunės radības!

x x x 

Smorglē lig snokė,*
žondā kap Magdės buruoks.
Šaltiu smagomā.

*Snukis – smakras.

x x x 

Dvėrat’ tekiniūs’
stėpėnā sauliem sokas.
Dūzgonti lėipa.

x x x 

Lapkrėtė pradė.
Kapelē nusagstītė
gelsvās žvaigždīnās.

x x x 

Maža čerkelė*
ont stala linksmā sokiuojės.
Žīdiejėms žondūs’.

*Čerkelė – stikliukas degtinei.

x x x

Pru katėla dungti
potas šnīpšdamas drimb.
Linksma ognelė.

x x x 

Šviežės naujīnas
ont ėlguos oudėguos sopas.
Šarkelė žvalguos.

x x x 

Balondē borkou:
„Bartstīsio, barstīsio, barrr…”
Doukem tū grūdū!

x x x 

Baltās dūmelēs
vėrst alksnė malkelės.
Rūkuos lašėnē.

x x x 

„Diekou” vės sakīk,
jė Dievs lėižiuvi devė!
Iveskem mada!

x x x 

Praskieliau viedrė*
pluonīteliausi ledieli.
Gīvībė apatiuo.

*Viedras – kibiras.

x x x 

Strakaliuo vākā.
Ont Žemės gaublio žalio
linksmėnas žiuogā.

x x x 

Pėktė leižiovē
viel pervažiav akietiem
Janelės dėina.

x x x 

Sauguot’ tikiejėma
kap vīzdi akėis sava
sentėkē* mokėn.

*Sentėkē – religinė bendruomenė.

x x x 

Mikseris suūž’
laibus pėrštus virpindams.
Pėrmuosės braškės.

x x x 

Kavuos joudomė
blausi lėmpa atsėspind.
Laukėma naktės.

x x x 

Pusnis ėšbadītas
slidžiu nuosiu ėlgiausiu.
Baltoms snėigelė!

x x x 

Gomboutas ronkas
brūžėn lėntas ousėnės.
Graba* darīsem.

*Grabs – karstas.

x x x 

Žvaigždīnā sospind.
Kuosmėnės legendas viel
žėluos’ galvuos’ gimst.

x x x 

Lėftė sopratau:
iki dongaus nepakels,
patē lėptė rēks.

x x x 

Neatleid šaltiu…
Gegot’ būs ožmigdius’
laikruod’ medini.

x x x 

Pončekuos’* megztuos’
babītės fantazėjės,
margas ėr ėlgas.

*Pončekas – kojinės.

x x x 

Trėgraš’* ikėšau.
Lai trat bornas, trat lai –
linksmiau gīventė!

*Trėgrašis – nuomonė, lindimas į kito kalbą.

x x x 

Karštis atslūga.
Makaluojės tarp kuoju
ėlgė šešielē.

x x x

Mama so babo
četkavuojė* kuopūstus.
Neblėka galvū.

*Četkavuotė – kopūstus smulkinti rauginimui.

x x x 

Poikē rokoujės*
bijūnā so ruoželiem
pri baltuos tuoruos.

*Rokoutėis – šnekėtis, kalbėti.

x x x 

Pėrtelės dūmā
pru longus joudus rėtas.
Kvep šviežės ontas*.

*Onta – vanta.

x x x 

Tievs so muotėna
kvėitius skersviejūs’ sėjuo.
Rogpjūtė darbā.

x x x 

Ėlgs svėrteis* kaklos
līgumuos’ liūdnā žvalguos.
Ėškeliava kaimos…

*Svėrtės – ilga kartis vandeniui iš šulinio semti.

x x x 

Rūžavė* kardelē
aukštam’ viedrė* somerktė.
Rōgsiejė Pėrma.

*Rūžavs – rožinis, rausvas;  **Viedras – kibiras.

x x x 

Kniauk katinielis.
Skaniuom dešreliem kvepėn
vėrtovė šėlta.

x x x 

Alkanas dėinas.
Pri namū gerū ėškėl
lesīklu stuogā.

x x x 

Žalē apkaišiem
aptrupiejos’ ikuona.
Bėrželė maldas.

x x x

Pėktā trunkuos
medinis kūjatielis*.
Teismos rodini.

*Kūjatielis – mažas plaktukas.

x x x 

Senuo nuotraukuo
nogaras ėlguos’ vaguos’.
Siejamas bolbės.

x x x 

Nukieliau sūnou
ėš paliepės sandalus.
Kuojė nebetelp.

x x x 

Žīdruo luovelie
daug daug galvieliu.
Gražoms gīvenėma!

x x x

Bolbīnė liekšties’
jau lauk dideliū burnū.
Darbšti šeimīna.

x x x 

Vedvė* nakvuojau
ont minkšta šviežė šėina.
Kvepou nuotīkē.

*Vedvė – mudvi.

x x x 

Šviežiausis medos
trilitrinie pri kelė.
Kūmas lauktovės.

x x x

Šiaulē ėr Telšē
veinuodā mūravuotė.
Sena teisībė.

x x x 

Saulės pergalė
pagimdė Šiauliū miesta
Lietovā švėistė.

x x x 

Pupu žīdiejėms.
Smolkės akelės paveiz*
kap vabalelē.

*Paveizėti – pažiūrėti.

x x x 

Mažā mergelē
šarka karuolius noneš’.
Pasaku knīgel’.

x x x 

Tīlomė naktėis
triūbas* uora viel drebėn.
Kaimė pagrabs*.

*Triūbas – pučiamieji instrumentai;    **Pagrabs – šermenys.

x x x 

Jaunam’ beržīnė
gegotė ožkokava.
Būs ėlgs gīvenėms.

x x x 

Teisē i dūšė*
mon veiz nemirksiedama
šolėnėis akės.

*Dūšė – dvasia.

x x x 

Aukštā gėiduorkas
„Sveika, Marėjė!” ožtrauk’.
Mėšės Vaičatiūs’.

x x x 

Žėimuos pabonga
Ožgavieniu ličīnas*
baisē ėšgondėn*.

*Ličīna – kaukė:   **Gundintė – gąsdinti.

x x x 

Pašta jau atvež’.
„Mūs žuodie” sorašītas
Skouda naujīnas.

x x x 

Tīla ož stala.
Kažkū bandīs pasakītė
kuortu kaladė.

x x x 

Tuoras maliavuo*
rīškē mielėnās dažās.
Dongos nosėleid!

*Maliavuotė – dažyti.

x x x 

Lašėniū paltē
ont kartiu somaustītė.
Skerstovė rodini.

x x x 

Vasara margoun.
Kap gražiausės pleštekės*
valondas praskrend.

*Pleštekė – drugelis.

x x x 

Mėltus sėjuojo.
Numeliūs’ rītuo kvepies
dounelė švėnta.

x x x 

Ašuoklius* skėnam.
Vasaras pėlnuos’ saujuos’
daug karuoliuku.

*Ašuoklė – raudonieji serbentai.

x x x 

Seduos bažnītiuo
arfa ont lubu grajėj.
Siediekem tīlē.

x x x

Vėdordėin’ mišiuos’
Renavas bažnītelie
abruozdelē* gėid.

*Abruozdelė – šventi paveikslai.

x x x 

Loukės bažnītiuo
auksėnio Nuojaus laivo
Saulelė plaukiuo.

x x x 

Rogē nopjautė.
Švėnts Ruoks Ylakiūs vielēk
žmuonelius laimėn.

x x x 

Baltė aniuolā*
ont septiniū kalvū top.
Telšiū sargība.

*Aniuolā – angelai.

x x x 

Laimingas dėinas!
Mažuos’ bornelies’ sotėrpst
ledā skaniausė.

x x x 

Sosiedūs’ budīn’*.
Tievā pu darbū ėšlek
Kalnū* gėiduotė.

*Budīnė – šermenys;    **Kalnā – Žemaičių Kalvarijos Kalnų giesmės.

x x x 

Katėns ont suopas
sau saldius sapnus murken.
Ėlgė vakarā…

x x x

Soūž’ šėršiu lėzds.
Maža pėlka truobelė
rūpesniūs’ noskėnd.

x x x 

Ežielis mažos
skreitė jaukē ožmėgės.
Retas radības.

x x x 

Gegožie pakvėp.
Muotuocėklās ėšzvėmbė
bruolė vakarā.

x x x 

Ont šniūra* plaikstuos
ėšblokės babas kvartūgs*.
Gīvenėm rodou…

*Šniūrs – virvė;    **Kvartūgs – prijuostė.

x x x 

Vasara prėsėrp.
Aukštas, lėiknas vėišnelės
viel špuokus viliuo.

x x x 

Kaima stuotelie
viejē ožrašus skaita
ėš senū plītu.

x x x

Per radėj šaukuo:
„Gīvenėms – ne joudraštis!”
Vielības žėnės…

x x x 

Dėdelė speigā.
Patvuorie katėnou vėrp
šerkšnoutė ūsā.

x x x 

Kinivarpas viel
medėnė skrīnalė grauž.
Tīlumuos garsā.

x x x

Vieju švėlpesē.
Muotėna vākus stėpriau
i dieki* sosok.

*Diekis – užklotas.

x x x 

Sraigės truobelie
dėina pu biški slepās.
Sotemas paršliauž.

x x x 

Trunkuos dā žaibā,
dongaus ėr žemės atstom
ogningā matou.

x x x 

Vėrš staktuos buočios
pasag naujė kabėn.
Gėm’ anūkielis!

x x x 

Ont mažū viniū
bėng seniausē sorūdīt’
dėdel’ dalīkā.

x x x 

Kelinta nakti
bandau laika stabdītė.
Lakštingalu mets.

x x x 

I.   Aukštuo luovalie
      daug patalū prikrauta.
      Laukam princesės.

II.   Patalū stėrtuo
        mėigt sošalus’ pricesė.
        Apatiuo – žėrnis.

III.   Mielėnė šuonā.
         Aukštuo luovalie nakvuojė
         princesė tėkra.

x x x 

Samanu kėlėms.
Skuzdielie rasuos lašė
pasauli mauda.

x x x 

Dongaus aukštībies’
liektovu joustas baltas.
Iduomė laiškā.

x x x 

Mīlėmė veidā
raukšliū raštās ėšpouštė.
Ne pavasaris.

x x x 

Naujėjē Metā.
Eglies’ skaruotuos’ sopas
dėdelė nuorā.

x x x

Laukė atlīdīs.
Kap posmarškuonie* kuošie
svėists ledgalė tėrpst.

*Posmarškuonė – košė, pusiau iš bulvių ir miltų.

x x x

Soluos rūgštelė
senam’ krūzalie* balkšvou.
pavasar’ sīvā.

*Krūzalis – didelis puodelis.

x x x 

Grīžau pu metu.
Dvė rodas šonėis akis
persmeigė šėrdi.

x x x

Lėipa prasėded.
Kalvarėjės Kalnus* eis
ne vėins rožončios.

*Kalnā – Žemaičių Kalvarijos Kalnų giesmės.

x x x 

Šarnelės kaimė
dėdeliūs’ regiejėmūs’
poets vės vākštiuo.

x x x 

Saluntū švėntuovė
kėkvėinam pavargosem
sparnus duovėnuo.

x x x 

Īlakē – Seda.
Septintam’ kėluometrė
Pašėlės štolpā.

x x x

Naktel’ per naktel’
vuobelelė suodėnau,
vėsā nemėgau.

x x x 

Skuoda miestalie
skaniausė čeburiekā
toristus viliuo.

x x x 

Rogsiejis bėngās.
„Dagilēle”* dainuos’ mauduos
viel Šiauliū dėinas.

*”Dagilėlis” – Šiaulių berniukų ir jaunuolių choras (1990).

x x x 

Mildas karūna
neš Gegožiu* muokīkluo
laimingė vākā.

*Gegužių mokykla – mokykla Šiauliuose (1972).

x x x 

Vasarė mienou.
Pražīd vėsė pašalē
Lietuvuos spalvuom.

x x x

Tīlė nomelē.
Kol platiuo pėtelnie* jem
čėrkštė lašėnē.

*Pėtelnė – keptuvė.

x x x 

Galingūs’ plaukūs’
nebsorinka duntū
ne vėinas šokas.

x x x 

Švėntos Kazimiers.
Baltiausė lelėjė žīd
Lietuvuos dongou.

x x x 

Pėlnė karklīnā
sau pėlkū letenieliu.
Pavasar’ špuosā*.

*Špuosos – pokštas, juokelis.

x x x

Viejē ožpūtė.
Viel šakuos’ linksmā sokas
zīliu lašėnē.

x x x 

Gėrdau karvelės.
Sojodėn platės šnervės
skaidri undini.

x x x 

Nebžėna, kuo laukt’
sotrūniejės soulielis
pri sena kapa.

x x x 

Mintis galvuo zīz.
Ne musis – plekšnė* pajiemės
neėšdaužiniesi.

*Plekšnė – prietaisas musėms mušti.

x x x 

Delna vėdurie
skruzdies ekskursėjė.
Pasaulis gražos.

x x x 

Jau atuostuogā.
Pakvėp keliuoniem ėlguom
traukėniū biegē.

x x x 

Svetiū solaukiem.
Ont stala rėtėniejės
ketor’ apelsinā.

x x x 

Ežer veidruodi
gabalelēs sotropėn
smarkiausis lītos.

x x x 

Jau ėšein pašals.
Tuoliūs’ didingā garou
Medviegalė kalns.

x x x 

Siedo ont kronta.
Praplauk’ ramumuos pėlna
valtės medėnė.

x x x

Bažnītiuo prisning
per Girdiškiu atlaidus.
Dīvā rogpjūtie.

x x x 

„Kor to veina, kor?”
Šaukuo žmuonis kas dėina
gražem’ miestelie*.

*Kurtuvėnai – miestelis Šiaulių rajone.

x x x 

Pendzeliokā* šuok
tarp lėngvū meistra pėrštu.
Spalvū sėmfuonėjė.

*Pendzelioks – teptukas.

x x x

Lietā snīguriou.
Visgi žmuogaus laimė ī
dėdlē paprasta…

x x x

Kinie pribėra
daug mažū vakulieliu.
Kaulės rūpesnē.

x x x 

Ramībie vėsė.
Tik diedės burnuo pīpkė
nervingā šuokčiuo.

x x x 

Mažeikiu herbė
strielie balta i tėksl lek,
nesostuot’ ragėn.

x x x 

Skaisti Saulė tek,
cīrulē* akmėnelēs
ėš aukštībiu krent.

*Cīrulis – vieversys.

x x x 

Gražiausē šokdėn
Žemaitėjės vieliava
Rauduonkalnė vies.

x x x

Perkėst rauduona
Saulelė ont Girniku.
Cīrulis sveikėn.

x x x

Dvė žmuogaus ronkas
ėr minkšta muolė gabal
Pondėiva sotvier’.

x x x

Stikliniem kuojuom
linksmā akmėnim šuokčiuo
opelė vondou.

x x x

Ož kvapnės dėinas
žemougiu karuolēs
vasar ėšpoušiau.

x x x 

Karštis atsėleid.
Prūda* kap pīraga pjaust
karpiu nogaras.

*Prūdas – tvenkinys.

x x x

Dailos vaikielis
kumpuotė saldės vėišnės
so šaukšto žvejuo.

x x x

Mažė pėrštelē
raidės kap paukštelius ont
lėnėju topda.

x x x 

Bemeigė naktės.
Kažkatram’ suodas* kėimė
armuonika kriuok**.

*Suoda – sodžius;   **Kriuoktė – verkti.

x x x 

Viel platem’ longė
trumps kaktosa žīdiejėms
pėlnati sveikėn.

x x x 

Jaunuo šeimīnuo
mamas sėjuon padelkas*
vākā nosagstė.

*Padelkas – sijono palankai.

x x x 

Do auksa žėidā
onkstība pavasari
vedom* pražīda.

*Vedom – mums dviems.

x x x 

Ėškūliem grūdus.
No smagiū* maišū solink
vīru nogaras.

*Smagiū – sunkių.

x x x 

Rītmetė gėismiū
patės jautriausės gaidas
ašaras ožsmaug’.

x x x

Švėntės ikarštis.
No smarkiū dainū liekšties’
šaltiena sodreb.

x x x 

Pats vėdordėinis.
Pīlės* triukšmingā torškās
Bartuvuos opie.

*Pīlė – antis.

x x x 

Gaidē pragīda.
Aukštūs’ verandas longūs’
spėndolē glaustuos.

x x x 

So Vėntuos opė
Žemaitėj kap brongė duovėna
Pondėivs apjousė.

x x x

Grīžau traukėnio.
Bet ėšlėpės nebtorio,
pas kū parētė.

x x x

Sraunē tebetek
žemaitiu krėkštamuotė
Vardadavės op’/ Varduvuos opė.

x x x 

Longa atdariau.
Lėipsnelė sava snapė
pavasar’ parneš’.

x x x 

Darbā ontpoulė.
Kap moselė ėšrūguos’
pradiejau skėstė.

x x x 

Lauko naujīnu.
Baimė dom* šaltās pėrštās
nogar čiupinie.

*Dom – dviem.

x x x 

Pradedo soprast’,
ka laimės juokiuos’ fuormulies’
neėšēn sorast’.

x x x 

Gėliausiuos’ malduos’
Barbuora Žagarietė
žmuonelius ramėn.

x x x 

Arkangels Mīkuols
Juonėšk’ miestelė Švėisa
akīlā sergie.

x x x

Ėšmintė takā,
kor Šatrėjės Raganā
ges saulielīdē.

x x x 

Jorgė Pabriežas
pamuokslu prisuodrinta
Kretinguos žemė.

x x x 

Vīskops Valončius
ėš Varniū parakvėjės
Lietovā tebšvėit.

x x x 

Ėš Kalviū kaima
pasėskleidė dėdingė
Daukant žīgdarbē.

x x x 

Per vėsus longus
kvėito vasaras viejus.
Ožuolaidas šuok.

x x x

Do mažė žvėrblē
ont apvalė stalelė
pīrag kaštavuo*.

*Kaštavoti – ragauti.

x x x 

Muokaus ėš vėštas:
padedo kiaušieli ėr
šauko pasauliou.

x x x 

Pasiotė vākā
ėš veidruodieliu paleid
saulės zoikelius.

x x x 

Aiškiausē matiau,
kāp tava giliuos’ akies’
dongos noskėnda.

x x x

Prapliopa lītos.
Greitā pėlks šalėgatvis
lietsargēs pražīd.

x x x 

Rogsiejė mienou
paskutinie šėlėmuo
vasar noskondėn.

x x x 

Da mienesėina
sostingusi tebklausuos
akmėnū šnektuos.

x x x

Ikaita dėinas.
Ėš nelaisvės pomporā
žėidus paleida.

x x x 

Platiausi sruovie
atskīrė opės krontus.
Tėltalis soved’.

x x x

Nu daržū posės
parbaltoun babas koudielis.
Karštīmet’ darbā.

x x x 

Baltėjės jūras
gėntarėnės paslaptis
audra ėšdavė.

x x x

Žaliuo pakruntie
dėdlē sraunos bangavėms
mon rūpesnius praus.

x x x 

Rodėnėis žėnklā.
Vėskas tora pabonga,
kas turiej pradė.

x x x 

Ožgėiduoj gaidē.
Nauji dėina pradiejė
roužītėis palėngvā.

x x x 

Varpū skumbiejėms
žmuonelius sovėrpėnės
buokštė ožsėdarė.

x x x

Palonguos rūmā
ruožiu aksuomė baltoun.
Karalėšks vaizdos.

x x x

Balondė mienou.
Gėmėma laika švėntėn
mona mergelė.

x x x

Jūruo saulė tėrpst.
Rausvūs’ šešieliūs’ mauduos
pėnkės žuviedras.

x x x 

Jaukiūs’ numeliūs’
ont dėdlē karšta pečiaus*
skani kuošė plep.

*Pečius – krosnis.

x x x 

Vėskas notėla.
Vakars līg avinielis
pri šuona prigloda.

x x x 

Gražē pri opės.
Tėn glousnē plaukus
mazguo ėlgiausius.

x x x 

Vākā ėšvažiav.
Sopīnies’ pu kaštuono
tik vies besėsop.

x x x 

Dėdelis ežers
viel leliju taurelies’
vakara gurkšnuo.

x x x 

Žvalgaus nu kalna.
Vakarūs ož eglīna
dongos ožsėdeg’.

x x x 

Naktėis vėdurie
untis prūda* pavėršiou
žvaigždelės lesiuo.

*Prūds – tvenkinys.

x x x 

Do ėlgė ajerā
kvapū skaniū pritvinkė
po douna atgol’.

x x x 

Bėrželė naktim
juonvabaliu žvaigždīnūs’
klaidžiuojo ėlgā.

x x x

Kurienā* praplauk’.
Maries’ bangas linksmā šuok,
meldīnā dainiou.

*Kuriens – kuršininkų žvejų medinis, dvistiebis, burinis, plokščiadugnis laivas.

x x x 

Vies vakarinis
viel so vietrungiem šuok,
šiaurinis pavīd.

x x x

Ėšsėpūt’ borės,
marės smerkē pajoudav.
Mienulis veizās.

x x x 

Pu aukštās medēs
žemė žmuonelē vakštiuo.
Fuontanā taškuos.

x x x 

Sena bažnītė.
Nelaukta svieti ėšdoud
grindū gėrgždiejėms.

x x x 

Ėšeino tomsuo.
Dongou vėinėša žvaigždie
nedrosē markstuos.

x x x

Nauji dėinelė
pru ožuolaidas smalsē
žvalgītėis pradiej.

x x x 

Žėbints lėngoujēs,
švėisa nelīgē barstuos.
Pasiotė viejē.

x x x 

Uora baliuonā
nu Trijū Krīžiu kalna
pu Vilnio žvalguos.

x x x 

Rodėns vakarā
i spalvuota šalėka
vasar sosoka.

x x x

Mielėns mienulis
senamiestė grėndėnio
šešielius vediuo.

x x x 

Sobildiej beigē.
Vėsos traukėnīs aplėp
uora bočėnēs.

x x x 

Rodou ėr viejē.
Karto so lapās skraidiuo
damu skrībelės.

x x x

Laikruodis tėksen.
Lašā ėš krana lėtiau
laika skaičiou.

x x x

Lėipas trīlėkta*.
Žemaitē būrēs trauk i
„Saulaukė”* nėbrė*.

*Liepos 13-oji – Žemaičių vienybės diena;   **”Saulaukis” – Šiaulių žemaičių kultūros draugija (1989);   ***nėbrė – susibėgimas, susirinkimas, pasilinksminimas.

x x x 

Spalvinga švėntė.
Parkė žmuoniū klegesīs,
grajėj gramuofuons.

x x x 

Pėrmė spėndolē.
Ož longo paukštē pragīd,
sočėršk’ žadintovs.

x x x

Pats vėdornaktis.
Dvė pelės naujės lėntas
skanē graužinie.

x x x 

Tas, kas omžėnā,
tik paleid, kas laikėnā.
Smertės* nebaisi.

*Smertės – mirtis.

x x x 

Tīloma laukūs’.
Rūkā vėskū oždongstė,
tuolėi šunis luo.

x x x 

Dėinuos vėdurīs.
Klevū paviesie linksmā
vakulelē čiolb.

x x x 

Žemės rotoliou
platė ėr siaurė kelē
tinkla nonierė.

x x x 

Linksmā šuokinie
garbanu spīruoklės ont
mažo galvelė.

x x x 

Mondrē sokiuojēs
tarp spalvuotu truobieliu
siaura gatvelė.

x x x

Meilės ruomanu
kėnėvarpas prirašė
ėlgiausės lėntas.

x x x 

Pėldau cokrėnė.
Baltė kristalelē blėzg,
arbatinis švėlp.

x x x

Saulė per līto
so Vaivas jousto mėškus
spalvuotā sorėš.

x x x

Kėkvėina dėina
tava kūns paded sogruot’
šėrdėis sėmfuonėj.

x x x 

Dongos murkšiuojēs*.
Dolkėns kelalis pavėrt
taškouto jousto.

*Murkšliuotėis – menkai lynoti (gerti, valgyti).

x x x

Ožvertiau kninga.
Eilieraštē sošėldė
net mūra sėinas.

x x x 

Senē pūgavuo.
Be keliū, be kelaliu
rūpiesnis slunkiuo.

x x x 

Žiuogū čėrškėmė
vasaras vakarā plauk.
Lietā, palėngvē…

x x x

Darbū abongas*.
Šatas* opelė sruovie
nuovargi plauno.

*Abongas – darbų pabaiga;   **Šata – upelis Skuodo raj.

x x x 

Rūkūs’ noskėnda
ėr dėdiausīsis oužouls.
Neblėka nieka.

x x x 

Vakara viesa.
Palėngvelēs gīsluom grīžt
kūna spiekas*.

*Spiekas – jėgos.

x x x 

Rogēs tėrštā kvep,
delnė drugielis trunkuos.
Lėipas pavakarie…

x x x 

Pavasarė laiks.
Jaunatvėškā veis švilpiuo
longus prasagstės.

x x x

I.      (1236-09-22)

         Akmėn’ kertini
         Saulės mūšė pergalė
         Lietovā devė.

II.     (1259)

          Rīžta kuovuotė
          Skouda mūšie siekmingā
          Almėns* sožadėn.

*Almėns – XIII a. vidurio žemaičių kunigaikštis.

III.    (1260-07-13)

          Žemaitiu jiega
          Dorbės mūšie galingā
          Ordėn parklopdė.

x x x 

Žuodē kap lokštā
prīš Kuosmuosa dėdībė.
Geriau tīliesio…

x x x

Ramībės muomėnts.
Ožmerktuom akim sklaidau
šėrdėis archīvus.

x x x 

Mediniūs’ krežiūs’*
geltuoniausė cėbolē*.
Tuoks žemės auksos.

*Kriežis – pintinė;   **Cėbulis – svogūnas.

x x x 

Pri katės pėlva
mažė rainė katatē.
Bėrželie radau.

x x x

Braškiu žėidīnā.
Pėrmās žemės mėrksnēs
gruožis prasėded.

x x x

Krūmus ėšpoušė
serbėntu auskarā ėlgė.
Macni rūgštēlė.

x x x 

Mamas koskelė*
nu vėnėis pru longa veiz.
Horizontė aušt.

*Koskelė – skarelė.

x x x

Gaidė šeimīna:
dvė raibas, ketorės – nē.
Rūpiesnis nemėnks.

x x x 

Šėlta naktelė.
Laidarė* kartēs mojou
do eržėliokā.

*Laidars – užtvaras gyvuliams, diendaržis.

x x x 

Tarp krapu, muorku
kanapės sargība ein.
Aukštė kareivē.

x x x

Javā ėšplaukė.
Ne varpas lingounās, nē –
dounelės jūra.

x x x

Griežtā rakts sotrat
senuos varpėnės spīnuo.
Zvanisem mišiuom.

x x x 

Galinie truobuo
šventāsēs nukabinieta
sėina platiausi.

x x x

Pasiov mergelē
so taškelēs jopēlė.*
Rītuo atlaidā.

*Jopelė – suknelė.

x x x 

Ramonės bortā
aiškoma neatnešė.
A mīl? A nemīl?

x x x 

Triukšmos suodnlie.
Naujajem’ ėnkėlė šuok
špuokā veselė.

x x x 

Prėsėskink vėišniu!
Gal ėšsėspjaudīs mėntis
mažās kaulelēs?

x x x 

Pu aukštuom pušim
tarp gondra ėlgū kuoju
vaikīstė sopas.

x x x

Ont arklė nuosės
ronka aksuomė ėlsās.
Pakvėp žuoleliem.

x x x

Unkstīvs rītmetīs.
Skouda torgaus maišalīnie
žousītē gėrgčiuo.

x x x 

Gerviem viel klīkaun
jau postoštės ganīklas.
Rogsiejė dėinas.

x x x

Dvīlėkta naktėis
sokielė šou alasa*.
Ežiū šeimīna.

*Alasas – triukšmas.

x x x 

Loubas kaimalie,
kor opė prasėded,
aš prasėdiejau.

x x x

Staigē atšāla.
Vėsū truobū stuogeliūs’
kamėns prakiora.

x x x

Slīvas šakelė
pru longus smalsē žvalguos.
Žīdiejėma mets.

x x x 

Pabonga darbū.
Kūns atsėleid, katie
pri kuoju glaustuos.

x x x 

Pagluostiau žėivė.
Ana gumbouta ėr šiorkšti
kap buočiaus ronkas.

x x x 

Žaliuom karūnuom
baltus debesis papouš’
trīs oužoulelē.

x x x 

Žėimuo – vasaruo
galinga apsauga skleid
Šatrėjės ognės.

x x x 

Jurgaitiu kalnė
vėsė pasaulė krīželē
pašnėbžduom meldās.

x x x 

Pėiniu patalā.
Atsargē kvėpoudama
vakara klausaus.

x x x 

Ėlguom drobīnuom*
dėdlē elegantėškā
naktės nosėleid.

*Drobīnas – kopėčios.

x x x 

Kėkvėins žmuogielis
sava gīvenėm kūli*
i kalna rėtėn.

*Kūlis – akmuo.

x x x

Vėsa Paberžė
pėlna gīdontiu žuodiu
Tieva Stanisluova.

x x x 

Pri mon truobalės
viel dongaus pripaišīta
platiausi pelkė.

x x x 

Aukštė žuolīnā
platiausēs vuoratinklēs
vasara gauda.

x x x 

Trīs gulbiu puoras
ežera veidruodie spind.
Gražuolis vakars.

x x x

Keptė vuobolā
kvepėn vėsus pašalius.
Ož longū speigā.

x x x 

Vāka pėrštelē
jūras pakruntie palėk
laikėn iraša.

x x x 

Blezdingas* snapās
vielēk padongės braiža.
Katėns kaitėnas.

*Blezdingas – kregždės.

x x x 

Mėglas atplaukė.
Zoikē žaliuos’ pakrūmies’
pėrti ožkūrė.

x x x 

Balts debesės plauk.
Lits* fuontana vundinie
palėngvelēs skėst.

*Lits – Lietuvos valiuta 1922-1941; 1993-2014.

x x x 

Puopėit’ arbata.
Karštėmė palėngvā tėrpst
bitieliu auksos.

x x x 

Naktim girdietėis,
kāp Šiauliū gatviem vākštiuo
bernioks auksėnis.

x x x

Tik trumpa laimė
naktėnems drogeliokams
švėisomė žvakės.

x x x 

Rodou parējė.
Vuobolā senam’ suodnė
ėr šėrdie daužuos.

x x x 

Vuos tik snėigs nuēj,
geltuonas akis pramerk’
švelnė šalposnē.

x x x 

Lėipas vėdurīs.
Kap katėn letenelė
dėinelė minkšta.

x x x 

Cīrulis pragīd.
Veiz žmuonelē i dongo
linksmā ėšsėvėipė.

x x x 

Smarkė lašā jau
moš pašala akmėnis.
Prakiorst varvieklis.

Silvėjė Uda. A tori Ognėis? Haiku žemaitėškā. Litera, 2021